నిజంలాంటి కలలోనో .... కలలాంటి నిజంలోనో

చిక్కటి చీకటిలో చల్లటి వాన పడుతున్నపుడు
చిరుసిగ్గులతో కలిసిన నులివెచ్చని మన ఊపిరి
మనమధ్య దూరాన్ని కరిగించాక మనమెవరో
తెలియని తన్మయత్వంలోకి మనం జారినప్పుడు
నిజంలాంటి కలలోనో కలలాంటి నిజంలోనో
మన మనసుల లోపల నిలిచిన చిత్రం చూసావా?
మబ్బుల మధ్య మెరుపులాగ తళుక్కుమంటోంది
అచ్చంగా మైమరపించే నీ తీయని నవ్వులాగా

మరొక వానజల్లు కోసం మనమిద్దరం వెదుకుదాం
క్షణ కాలం మెరిసిన మెరుపుల కాంతుల మధ్య
కరిగిన కాలం మిగిల్చిన తియ్యని జ్ఞాపకాలని
కలిసి పట్టుకుందాం కొత్త కలల నారు కోసం